14th August 2011

Armed Veng South Branch YMA
EXECUTIVE COMMITTEE VAWI-8 NA (409)
THUREL TLANGPUI

* Kumin YMA Gen. Conference-ah kan Branch in Zaipawl nei ve dawn *
* CM Running trophy-ah Branch YMA - in pakhatna nih an tum*

13/6/2011 Avs :  Ni 11.8.2011 zan khan Branch YMA Committee roon-ah Branch Executive Committee neih a ni a, chuta an thurel tlangpui lo tarlang ila :

1.Library Sub Committee a\anga lehkha hmuh : Library Sub Committee hnen a\angin Lehkhabu dahna tur Almirah siam dilna leh Lehkhabu kawm tuamna tur senso an rawn dilna chu tihhlawhtlin sak nise tih a ni.

2. Cultural Sub-Committee Chairman phatna : Cultural Sub-Committee Chairman Pu K Saithuama chu vengdanga an awm tak avangin Cultural  Sub-Committee Chairman a nihna chu a rawn pha a, a rawn phat ang hian pawm a ni a,  Cultural Sub-Committee chairman a tan hian Pu R Zohmunsanga chu ruat nghal a ni.

3.Chief Minister Running trophy for Cultural dance Competition chung chang : Kumin September/October ah hian Chief Minister Running trophy for Cultural dance Competition a awm dawn a, hetah hian Branch YMA pawh tel ve ngei nise tiin a rel a, a \ul anga hma lo la turin Cultuaral Sub-Committee te ruat nghal an ni.

4.CYMA a\anga Lehkha hmuh : CCC meeting chungchang leh RSBY Enrolment chungchang te Mizoram Bamboo day chungchang te chhiar chhuah a ni.

5.YMA General Conference-a Item neih chungchang : CYMA a\anga lehkha hmuh, kumin YMA General Conference Ni 25-27.10.2011 a Kolasib a neih turah Special item emaw Zaipawl nei thei tur tan in report  theih a nih thu dawn a ni a, Gen. Conference-ah hian Zaipawl \ha tak neih ve nise, a \ul anga hma lo la turin Branch OB te ruat an ni.

6.YMA chhang Sports dilna : YMA chhang te’n ni 15.8.2011(monday) a YMA chang sports neih an rawn dilna chu rem tihsak a ni.

7. Sumtuak dan tur : Sum tuak na atan hian October thla chawhma lam hian Blancket suk ni se, hun remchang hmasa berah Sangha zawrh nise tih a ni bawk.

8. Solid waste Management Committee din chung chang : Aizawl Municipal Council Chief Executive Officer Pu Nghaklianmawia hnen a\angin Solid waste Management Committee-a Branch YMA ai awh in ruat tura a rawn ngenna chu pawm a ni a, Branch-aiawh a Committee a tel turin  Pu F Thansanga Fin.Secretary leh Pu C Lalbuatsaiha Asst. Secretary te ruat an ni.

Chhungkua

Branch YMA  : Ni 11.8.2011 zan khan Branch YMA Committee room ah meeting an nei.
    Ni 26.8.2011 zan khan Branch YMA OB leh Vengchhung Kohhran hrang hrang thalai hruaitute nen Joint meeting neih a ni a, an rorel angin ni 31.8.2011a neih tur vengchhung thalai kum 14-20 inkar te tan Mizo nunmawi in zirtir na chung changa hmalak dan tur an sawi ho.Tin, Bialtu MLA Pu Lalsawta chuan PA set -1 Branch YMA min rawn pe a, a chungah Branch YMA chuan lawmthu a sawi tak zet a ni.
    Pu Ngurthanmawia Sailo Section-I te chhungkua chuan an nu Pi Lalthlengliani boral ta tuamna puan Branch YMA-ah an rawm pe.

Section-I: Section sumtuak nana Tui leh Electric bill bial neitu ten mahni bial theuh vil ngen leh zual turin an in ngen a ni.

Section-II: Section sumtuak nana Tui leh Electric Bill tlawmngaia pete chungah lawmthu an sawi. Bial vawngtute’n mahni bial theuh ngai pawimawh leh zual turin an in ngen bawk.

Section-III  : Section-III  Ni 10.August 2011a Sachek siam leh zawrh hnatlang a member thawkchhuak zawng zawng te chungah leh lo leisaktu te chungah lawmthu an sawi a, Phaltaka In hmantirtu Pu K Laldailova te chhungkaw chungah lawmthu an sawi bawk a ni. An Section Committee member Tv Aldrin Lalthazuala chu 1st Manhunt Judge niin  an Section member Tv MC Laldinsanga pawh Manhunt show-ah a la tling ve zel an chhungain an lawmpui hle. An Section Committee Member Nl Lalchhanchhuahi chuan Zirna avangin Phai lamah a awm bo san section chuan  an lawmpui rualin an lawmpui tak zet a ni.


 Article :  ‘Zuapa’
                         — Lalrinsanga Chhangte, Sec.-III           
    Suihlungruala kan lawina run;
    Fan chang ni zawngte hian
    Ka zuapa ngaih a zual,
    Awmlai lunglian lo hrang chuanin
    Laitha afan maw, zamual aliampui ta.
    He khawvel eng ka hmuh ve tan dek dek atang tawh khan hmangaih leh duat taka min enkawl naah ka Pa, lawmthu ka hrilh a che. Thiante zingah rualawt leh mi neih ka it lohna turin i theihtawp i chhuah thin, ka Pa kan va chhuang tak che em. Ka tan i tha leh zung i sen nasat zia te hi engtin nge ka rulh zawh theih ang che le, ka Pa, ka rulh theih dawn loh vang che in ngaihdam ka dil a che.
    Ka tan i inpekna zawng zawngte hreloin hei leh chen ka lo awm tawh, engvanginge min hmangaihna kha ka lo hriatthiam loh thin le? Ka Pa, min ngaidam rawh aw..Ka mawina tur anih chuan thing taka awm pawh i thlang a, ka puar na tur a nih chuan riltam i thlang thin.
    Chhungkim taka awmin i hlim hmel ka hmuh theih lai khan min hmangaihna hi lo hrethiam tawh ila aw. Ka Pa, rulzo thei dawnlo che mah ila ka theihtawp chhuahin ka rul ang che, mahse atlai zo tawh si, min ngaidam rawh aw.
    I hlimthla ka thlir bang theilo, nangngaih lunglen hian kianni a nei dawn silo. I hmangaihna an ka zawngte kha, lo hrethiam ngailo mah ila, tunah chuan ka nun kaihruaitu atan ka hmang tawh asin. Vawikhat tal rauthlain min rawn fang la, i hmangaihna min han hlan leh ta che. Thlafam runsang kai tawh mah la, ka rilruah hian daih ni i awm mawlh lo.
    I tello chuan hringnun palthiam ahar dawn mange, amaherawhchu i sulhnu zui thei tura min zirtir thinna te kha rilruah vawng reng chungin hmatiang sawnzai ka rel mek e. Ka Pa, chakna ka neih theih nan i awmna atang khan min lo thlir reng dawn nia.
    A tawp ber atan chuan ka Pa, i tan ka tihtheih tawk tih na chang ka hriat ve hmaa min liamsan ta mai hi ka hrethiamlo hle a ni. Engtikahmah rulhtheih tawh loh tura i awm hi apawi ka va ti em. I awmna Engthawlna khawpui mawiah chuan i hrai hi ka lo kal thlengin min lo hmuak la, i sulhnu nuam taka ka zawh theihna tura kawng mam tak min siamsakah hian i rauthlain min rawn zawhpui turin kan la ngen fan che a ni.

Thangkhawk



+ Hmangaihna awmzia hi Pu editor min lo hrilh teh #  Alav
+ Bike ring taka khalh thin ho hi rethei leh mawl deuh an ni tlangpui an ti #  sms
+ Bawlhhlawh paih motor hi tun ai hian a tlan ngun tir theih em le ?  kan chhawr tangkaiin kan khawtlangin faina kawngah hma kan sawn phah nasa si a,  a lawmawm em mai. #  sms 
+ Kan veng tleirawl leh rawlthar te in fakawm e.  Khawhar in kalna chang kan hre chho ta. Armed Veng South nih a nuam thin e.. # Gareth Bele
+ Keini Section-I chuan kumin ah tlangau kan nei lo niin a lang Tlangau hlawh kan chawi ve tho dawn a nih chuan hriat ve ngei turin au se,  a tha kan ti khawp mai. # Mami pa
+ Zu i ruih hian i mawl zia leh i changkan loh zia sawi lovin i tlangau puia,  mi hmuhsiti tawk a nih pawhin i tawng buak a ni tih hria ang che. # sms
+ Community shield nena bul tan chu a dan a dang leh ta zar mai. Mr Kop te Matlani Armed Veng South te tan chuan kan va huphurh awm leh ta ve aw. Glory glory Man utd ti leh hp hep ila a ni mai # lhp Sailo
+ Kan Community hall kawt saw taxi lkeh lirthei dang dah an khap vanga hung a ni in ka hre si a,  tunah sawn an va ding tam thei leh ta si ve.  Thir tlawn kha an rubo ta em ni? # Man Utd
+ Pu Saitawna (L) in bul kual lai taka passenger drop fo mai hi a kal ve duh tan a buai thlak duh khawp mai, sim hmak chi a ni. # Laia
+ Tun tum EPL chu Man utd te kan va huphurawm dawn ve, an ni hian min hre ve lo mahse, tan zawng han neih hi chu a nuam ve a nia ti raw. Angaia khawlhring kha i va pawr lo ve # Utd Man
+ Tunlai hian PHE Tui Meter ruk ching an awm leh ta tlat mai.hetiang tih ching te hi chu dim miah loh tur,a thei thei chuan i enthla fo teh ang u.  # sms
+ Kan veng atanga Zonet Mizo Idol a elimination round pal tlang te kan chhuang khawp mai che u, in kal leh zel na tur ah duhsakna sang ber kan hlan a che u # M/75
+ Kan vengah hian hnamdang/ foreigner hmuh tur an awm leh tanawk mai. khawilaiah nge, tu In nge maw an luah tuh hriat loh an awm nual mai, arang lama en fel chi niin a lang # sms
+ A tifaitu i nih peih loh pawhin, a ti hnawktu nih kher a ngai lo, fai i tlin e # Tetei pa
(A bul berah ‘TK’  tih chhut hmasak tur a ni. Thu thawn zawng zawngte hi Branch YMA-ZNP ngaihdan a ni kher lo. Kartin Ningani hmain thawn thin tur a ni e.Short cut pawm a ni lovang. No. (8014163250)

LAWMTHU SAWINA

    Dt. 2.8.2011 khan kan veng atangin Taxi Number MZ 01 B 5875 Tv Lalhmua khalh ah ka chuanga, ka Mobile ka theihnghilh palh hlauh mai a, anin lo kawl tha in min rawn pe let leh thlap mai a ka lawm em avangin, he chanchinbu kaltlang hian lawmthu ka rawn sawi a ni. Hetiang mi rinawm tak Driver an awm thin hi a chhuanawm takzet a ni.

            Sailoliana Sailo
            Armed Veng South Section - I

KUMPUAN HMALAKNA

    Ni 11.8.2011 zan khan Chite veng khawtlang Duty te chuan kan veng mi pahnih Lalhminghlua s/o Lalzarliana Section-III leh Lalrinmawia s/o Laldinchhunga (L) Section-III te an lo man a, Branch YMA ah an rawn thlen angin Branch YMA chuan Excise kutah a hlan. An kut atang hian Parvon-7 cap man a ni.

Sd/- Secretary
Kumpuan Sub-Committee

Editorial: Hna i thawk ang u...

Tunlai kan thalai tam tak te hi mahni theih ang tawk tawka hna thawk mahni pocket money tal thawk chhuak hi, mi engnge maw zat an awm ve ta, hei hi thil lawmawm tak a ni. Chutih laiin, chhungte chawmhlawm nih zak miah lo , hnathawh tum bawk si lo, zing tak ngial pawh tho hma peih lo erawh kan la kuhtul  thung, Sikul chawl hma kan tam ta mah mah, Sikul pawh kal tha peih lo chuan hnathawh chu an peih vak a rinawm bawk si lo. Nu leh pa te paw’n kan fate hi eng ang mi nge rawn ni se kan tih, tih hi kan in zawh nawn fo a ngai a ni. Chuvangin, an naupan lai atanga kan in zirtir that  a ngai, an nun kan kaihhruai that loh chuan, chhungkua mai bakah khawtlang thleng pawhin a nghawng a, mi chuang, in la changkang engmah nei si lo thatchhe bawk si kan veng hian kan ngah palh a nge.
    Hei erawh kan hriat nawn a tan, Thalai te u, engmah i thawkchhuak lo a nih pawhin Ruihhlo lak ah hi chuan in thiar fihlim hram ang che. Thawhchhuah nei bawk silo Ruihhlo laka fihlim bawk si lo tan he khawvel ram zau ah hian  hawina a zim tawlh tawlh mek chu a nih hi. Chuvangin thalai te u, in that lai hian a tha lam kawng zawh ngei turin mahni theuh i in zir tang tang ang u. Kan tan, kan chhungkaw tan, kan veng tan, hna kan phak tawk theuh ah, awm mai mai lovin leh Rui thle mai mai  lovin hna i thawk ang u.

7th Aug.. 2011

SECTION-I SPORT THLIRLETNA

    Dt.30th July 2011 (inrinni) khan 1st Bn.MAP Field-ah Section sports ropui tak an hmang a, member kalten nuam an tiin zawngchhang tlak an ti hle.
    Opening match inkhelhah Section pa ho intelkhawmin Section Committee member awm ang ang te nen an han inkhel chu Sertawk rah pet hunlai Thlawhbawk sertawk futbawl tornament ai pawh khan a nep bik hauh lo...pa ho zingah an hming kan sawi seng vek dawn lova, mahse... Pu R Vanlalthanga’n ballboot buntur a neih loh chhuanlama coach nih a hauh tlat te, Pu B Saptawnate midfield-a an han che tak tak te leh Pu T Rohmingliana te ball awmna apianga ball chuh tuma an han phit \hinte  kha chu ropuidanglam tak a ni.
    Section YMA Chhang lamin sports hlawhtlinnaah an ti hlung a, fate nena football khelh han hmuhnawm dan kha, a \henin an chuh na ngam lova, a \henin an fate an inbum tir thul, Section  leader ber referee anih theih tak silovah chuan tiin field chhungah whistle pathum ngawt mai a ak lut a, ball khalh rei deuh te, ball an chhuhsak laite, a duh duh huna a ham thin erawh kha chuan game ati \ang \ha et awt lo nain entute erawh ati hlim phian a, referee tak zawk Pu VT-a penalty pet tur tlan vel khan entu te a ti lungawi hliah hliah.
    Section  sports a hlawhtlin lohna lian ber ni a lang chu Opening match khel tur hian Branch OB te,Branch Executive te, Section II & III OB te sawm niin Section II & III lam a\angin \awiawmna an hmu a, an lawm hle. Chutih laiin Br.executive committee memberte’n hetiang ang a sawm anni tih hi an inhre lo nge ni tumah telpuitu an awm lova, Section pa ho opening match an khelh pui turte bakah Section hruaitute an hawihai ru hle a ni. Section memberte an phurin a kal ten nuam ti viau mahse member tam zawk an kal thei lo erawh a pawi an tiin Section Secretary-in information-lamah ka chak lo a ni tiin a inthiamlo hle. ‘Fur ruahtui tlak zawh ‘Ber thla engemaw berah hian Section sports hei aia ropui zawk neih leh an rilruk a, chutah chuan kan tum hmasakna hmun, veng pawnah niin Section pa hote pawh lo inring leh turin an ngen duh a, Section memberte leh YMA chhangte pawh lo inring reng turin an chah a ni’ an section Secretary in ati. ( Section pakhat vulh len tumna a ni lo a nia. Ed/-)

CHHUNGKUA

 

Branch YMA  : Ni 5.8.2011 khan Central YMA Committee room-ah CEC meeting an nei, hetah hian CEC member kan Branch YMA President Pu K Lalthlantuma pawh a han tel. Chief minister runnung trophy for Cultural dance Competition a awm leh dawn avangin, Lam mite lo in ring ru deuh turin an in ngen a ni.

Section-I: Thla a lo thar leh ta a, Section Bill bial neituten mahni bial theuh lo vil uluk tur leh hmasawn tumtaka tanla turin an inhriattir.Sangha bial neitu sangha man la thehlut lo ten a rang lamin Treasurer hnenah thehluh tur a ni e.    
    Tin, an Section Committee member Pu Ngurthanmawia Sailo, a nupui Pi Lalthlengliani’n a boralsan chu an tawrhpui hle.Section Sports an neihah khan Branch YMA Beep suk fai tur a hawn tute khan a rang lamin Secretary hnenah pe kir tur a ngen in ni bawk.An Section Fin.Secretary Nl Lalrosiami pa Pu Manglunga pawh   damdawiin atangin dam takin a rawn chhuak thei a an lawmpui hle a ni. 

Section-II: Thla a lo thar leh ta Tui leh Electric bill bial neitu te khan mahni bial theuh thahnem ngai taka khawn leh turin an in ngen a, chutih rualin chhungtin te pawhin Section sumtuakna ani tih hria in remchang lo siamsak turin an ngen a ni.

Section-III  : Ni 29.7.2011 zana SIPMIU in awareness Campaign an rawn neihah section ai awh a Ushering leh Refreshment buaipuitu te chungah Section chuan lawmthu a sawi mawlh mawlh a ni
    Tin, Vengchhunga chhiat tawk an awm vangin Committee thulh a ni a, rawlkhawlhna dang a awm loh chuan  Ni 11.8.2011 ( thurs..) ah a hun ngai ah Committee neih tur a ni tih member te an in hriattir a ni.

Puipate thukhawchang  : ZNP a vul zel dawn ni in alang. Puipa thar hmel alang e. Tv. Lallawmzuala, Sec. III leh Pu Richard L. Sailo, Sec. II ten ZNP Puipa  finchhuah turin Puipate zingah an lawilut ve leh ta. ZNP hmel a that zel i beisei ang u. Tunah hian ZNP puipa Section tin atangin mi pathum theuh an awm ta a, thuthar lam tak tak kan chhiar zel theih nan Puipate i tawiawm zel ang u.

— KHAWTLANG NUN I SIAM THA ANG U —

1. Kan khawtlang a lo thianghlim zawk theih nan engnge i tih ve dawn le.
2. Kohhran NGO ah i in hmang viau a ni thei  mahse, i thil tih kha mi zingah sawi vul vak ching suh, miin an nuihzat mai ang che.
3. Aia upa zah hi kan pi pu chena kan hnam kal phung leh mawi tak a ni a, chuvangin i chhawm nung zel ang u.
4.  Thil i tihsual palhin ngaihdan dil hreh suh. mi pangai zia  a ni ngai e.
5. Mi zinga i awm in mi chetzia thlir thin la, mahni phur zawng lo  phul pui hluah hi mi mawl zia a ni. mi ningkhawng ngai chang thiam  apiang te hi mi pangai an ni.

LEI PIAH LAM RAMAH

        Pu.R Lalbiaktluanga (K-64)  A nupui  Pi Biakchungnungi Section-III chu ni 5.August 2011  dar 12:00 (noon) khan TB natna  avangin  a boral a. A ruang hi tlaivarpui a nih hnuin a tuk chhun dar 12: 00 (noon)khan ui tak chunga vui liam a ni. A mah hi UPC of Mizoram Kohhran member a ni.
     Lusûn chhûngte Lalpa’n thlamuanin awmpui zel rawh se.

Kumpuan hmalakna

    Ni 22.7.2011 khan zuruih avanga buaina siam heng mite hi zilhhau an ni
    Hmangaihsanga    s/o    Laldingmawia         Sec-III
    Malsawma     s/o     Roland Lalramzauva     Sec-III
    Lalnunmawia     s/o     Roland Lalramzauva     Sec-III
    Lalthlamuana     s/o     KC Tluanga (L)     Sec-II
    Lalchhandama     s/o     Pangura AO         Sec-III
    Lalfakawma     s/o     James Zoleta         Sec-III
Ni 24.7.2011 khan heng mite hi zu mansak an ni:
Zosangliana     s/o     Sangthangpuia     Section-II
Lalmuanpuia     s/o     Laltlanliana     Armed Veng
B Zoremtluanga s/o     B Vanlaltluanga     Armed Veng
Lalnunthara     s/o     Lalrinliana     Armed Veng
    Tin, 1st Bn MAP R.P Duty tenTaxi stand-a zu an mansak Branch YMA-ah ziaka an rawn thlen te :
1.K Lalrengpuia s/o Hranghluna Rakzu fun-15
Taxi No .MZ-O1 C-3415 .Armed Veng South
2.Lalzawmliana s/o Rualkhuma (L) Rakzu fun-8
Taxi No. MZ-O1 B-6266. Armed Veng South
    1st Bn MAP RP duty te hian man an nei leh a nih chuan YMA-ah an rawn hlan zel an tum. Rim taka RP duty te chungah Branch YMA chuan khawtlang nun siamthatna kawnga an hmalakna avangin lawmthu a sawi tak zet zet a ni.

Sd/-Secretary
Kumpuan Sub-Committee

Article : AUDITORIUM THA AW....- Tetea.. Sec - 1

    Kim kim-i pa in a kan veng tan a Hall / Auditorium a it thu a rawn rawtna kha ka lo chhiar ve a, a tha ka ti in khatiang a rualawt tu, hmasawnna atana ngaihtuahna sengtu kan nei kha a tha ka tiin ka thlawp tlat a, Man Utd tantu phei chu nise zanriah eipuiah ka sawm ngei ang.
    Hall/Auditorium tur atan chuan a chung ber chu a ngai ngei tawh a, chuta tan chuan ka suangtuahnaah chuan Muma School tual a Volleyball ban hrulah khuan han lai dung mai ila, a a ban kha a len vak theih dawn loh avangin, hlai deuh siin, kil thum neiin a siam theih a, banah chuan Volleyball hrui thlunna tur thir kawm chhun hnan in a hman theih.  A ban piah ta zawk hi Sikul leh Tanky inkarah emaw, tanky piahah hian emaw a dintir theih turah ngai ila, Hall chung atanga rawn inkhawh thlain chumi lo do leh tur chuan Metal road leh cement plaster chinah khuan hall lam nek deuhin ban phun leh thliah tur a ni. Heng ban hian kawngpui a motor tlan a dal lo ang a, tin ban dang hian hall hnuaia motor lut tur a dal  thei lo bawk a ni.    Kimkimi pa khan auditorium tur a lo duan atang khan ti hian ka suangtuah ve leh ta a, kan hall chu Committeee room chungah kawngpui vangtan zawngin a in chhuang toh vu ang a, a zau pawh a zau viau ang, chuan tuna hall luhka lam Feet 15 vel zet mai hi a tluanin varanda-ah kan hmang ang a, Varanda thlang lam ko atang chuan Zemabawk, kan veng leh Tuikhuahtlang zawng zawng a lang uarh ang a, Kim kimi pa in a chhaklam varanda-a hmana MT hungna pal awngrawp leh a kara bawlhlawh, a funte ruak lo awm zauh te nen a melh reng ai chuan khawthlir nuam deuh turah ka ngai.
    Chanmari Hall-te khi a hmun a laili that avangin an hmang leh mai thin a, an buaina ber chu motor parking a ni. Aizawl Central Hall, Venghlui a mite khi a lar ang hu a an hman regu lohna chhan chu parking bawk a ni, Chhinga Veng, Ramthar, Ramhlun, Bethlehem College veng han thlir kual ula Parking-a buai thei vek an ni. Keiniah hian kan awm veng vawng viauva, kawng a chhuk chho ti a kan inthlahrung anih pawhin kan veng leh Bethlehem in kalpawhna nawr nan bakah a in kalpawh theih vek tawh tih hriat a tha, chuan an duh leh Chite veng lamah tlan thlain World bank kawngah nuamsain an tlan tawh dawn a lo ni. Ka hriat sual loh chuan tunah hian kan veng thenawm chuan Ramthar nen a motor a inkalpawh theihna awm pawh a ngaih lohna hmun Theihai luiah khan Armed Veng-Ramthar- Ramhlun - Bawngkawn an project luah mai a ni awm e. Thlanlai thin pa tawngduh deuh ten duh duhnaah lai ru, engtik khawtikah mah kawng a tlang lovang tih ngawt chi a ni lo. Ram a thang ang a, a la kaw hel hul mai ang. Hall changtlung tak nei ta ngat ila, keiniah chuan motor parking na tha bawk si nen Kim kimi pa sawi tawh ang khan beisei loh deuh deuh khual tha kan thleng reng ang a, minister lo kal reng reng lo tur pawh an lo lang ve sek lo thei lovang. Tunah `16 lakh kan nei a, heng sum hian Hall chungah hian duh chuan a aia te hret emaw a tiat chiah hian kan khawr pum ang a, kan hmang kan hmang ve ang a, a tangkai ve em em ang.
    Sawitawh ang khan kan sum neih sa a parawl in tur khawrpum nge kan duh, nghah leh deuhva sum tam zawk nen a Aizawl khawpui a hriat tham Auditorium sualchhuah. Electric Veng pawn Power Deptt ram a nek a, an nek reng ang a, a la hlawhtling maithei,  lo mai thei. Dawrpui hoin Aizawl multipurpose centre neih dan tur an rel a, a intham fe hnuah an bei a,an sual hnuah kan hre chauh, tunah chuan UD&PA atanga an hmuh Rs.600 lakhs nen an sa tan dawn ta. A thatna tur leh Zoram mipui in a kan intawm tur nia an sawi ang zawng zawngah khian hun a lo kal zel anga

          Ruang dah lailawkna tih vel bak khi chu kan in hmantawm luih luih teuh lo.  Keini pawh hian tuna kan sum neih sa hi dah tha rih in engtin emaw sum tam zawk nuai zahnih za thum vel UD&PA  emaw NBCC an ti emaw ni. Chief Minister kaltlang hian sual chhuah i tum ve ang u. A tul ta anih leh nakin lawk a Local Council inthlan turte pawh Boycott ila, a hnu leh deuh a MLA inthlan turte nen pawh. Kan veng hian inthurualin hma ila ho tak tak teh ang u. Engtikahmah thlanmual kawng hi an metal lo ang a, CP road kawng laih sa khu an metal bawk lovang.  Chungte chu sawiloh, kan kawng dung metal sa pawh hi an chhiat fe hma chuan an repair lovang a, an repair chhunah lah an la ti tluan leh lovang. Kan veng mipuite hi tangrualin kan hruaitute hnung zui tlat ila, hlauh nei lo ila, kan veng tan infrastructure lian tham sual chhuah hi chu kan duh leh duh lovah a innghat niin ka hria.

 

Thangkhawk :

+ JFC ho kha kan tan lutuk che u, kan veng future tur in nih kha. In kal zelna tur ah duhsakna ka hlan a che u. # In fans ruhkawl.

+ Kan pa duhtak, ZATHANGA. He khawvel hrehawm chhuahsan a, chatuana chawlhna chang tura min kalsanna ni champha vawi-7 na ni 4 Aug. 2011 alo thlen hian kan ngaih che a zualin, i sulhnu leh hlimthla ten tahlai min ban tir thei mawlh lo a sin! Chatuan chawlhna ram atang chuan i kalsan takte hi min rawn thlir thin dawn nia. # Thangkhumi leh a fate.

+ Kan phunnawi ve lawks. Kan veng VC information mike hi siamthat dan a awm thlawt lo a mi? Section-I lam hian mi hriat ruala thilpuan hriat kan va duh ve, a bengvar thlak lo em mai! I ti ve lo maw, Pu. Tk? # Thilpuan hrelobuaia.

+ Kapu, pu Joyshi-a in bul step sira ekin leak hi a va’n tenawm em! Inkhawm kal lai te hian a rim a chhe thei hle mai. An thenawmte ho hi an va phun lo zawk ve a! Kan AMC hian han en ve teh se. # James, Sec I

+ Thawhtan zana ka mobile ka tih bo lo chhartu kha i rilru that avanga min pek let leh avangin i chungah lawmthu ka sawi mawlh mawlh e. # Hmaa R

+ Zan a Bike swithchoff a rawn tlan thla thinte khan petrol in neilo a tlan ngei ngei a ngai a nih pawhin tlemin tlan muang deuh teh u. Ka hlau lutuk. # Scooty rider

+ Vengdang Anganwadi-a thil an dawn leh kan veng a kan dawn hi a inang miah lo! Kan dawng tlem deuh a ang khawp mai. # A  AW B zirlai

+ Kan veng changkan theihlohna hi engvang nge ni ang tih hi kan inbihchian a ngai khawp mai.... Hnathawh nachang hre lo leh awm mai mai, engkim duh ve vek si kan tam hian, changkanna aiin hnufual lam kan pan mek a ni tih hi kan inhria em le ? # Felbiklova 

 
+ Kan veng thalai tam tak mahni ke a din tum rualelna tak tak pu kan awm ta nual mai a, lawmawm takzet ani. Chutih ruala Khawtlang leh Kohhran activities chhuanlama chhuak chhuak thei kan la awm cheu hi a zahthlak takzet tih i hre thar teh ang u.......# Man utd.

+ Kan veng hi a mawng an ti thin a, a dik tak zet a ni. He tih rual hian chgangkanna tirengin min luhchilh ve thina, engah nge kan insit bik chuang ang le? Liverpool FC  tantute kan tha maw? # Hmangaihhlulova.

+ Kan veng Anganwadi ah hian  neutrition a chhe bik khawp mai , a bikin Jail bulah hian  MHIP lam khan han ngaihven deuh teh u. an hmelhriat tha chu an pe tho a nia # sms

(A bul berah ‘TK’  tih chhut hmasak tur a ni. Thu thawn zawng zawngte hi Branch YMA-ZNP ngaihdan a ni kher lo. Kartin Ningani hmain thawn thin tur a ni e.Short cut pawm a ni lovang. No. (8014163250)

UD & PA  SANITATION CHUNGCHANGA
MIPUI TE HRIATTUR LEH ZAWM TUR

    UD & PA Department hnuaiah kum 2010 October thla atang khan vengchhung ah Bawlhhlawh paihna Motor kal tir thin a ni a, kan veng pawn hemi atang hian tun thlengin kan la chhunzawm ve ta zel a faina leh thianghlimna kawngah kan Khawtlang pawn hma kan sawn phah hle ni in a lang. Chutih rual rual chuan Sorkar in heng kan Bawlhhlawh paih dan chungchanga Mipuite zawm tur leh tih ngei tur DAN a siam a,  heng dan leh dun te hi zawm ngei ngei tur a hriattir kan ni bawk chung te chu han tarlang ila :-
1. Bawlhhlawh hi veng len dan a zira kartin vawihnih emaw vawithum emaw Bawlhhlawh paih motor tlan  thin tur a ni.
2. Bawlhhlawh reng reng Pack ngei ngei tur a ni a, (Polythene, Buara emaw Ip ah emaw) Pack thlap a nih loh chuan  paih loh tur a ni.
3. Bawlhhlawh paihna lai Point siam vek a ni a, a point a mi lo chu bawlhhlawh reng reng lak leh paih loh tur a ni. ( Mahni remchanna laia lo chan ve ngawt hi dan kalh a ni )
4. Bawlhhlawh kan tih zingah hian heng Hnim hring leh Leivung, Lung, Ran thi leh Ek lam chi reng reng paih loh tur.
5. Bawlhhlawh paihna Motor kalna tur dal in bungrua leh motor eng chi pawh kawngah dah phal a ni lo. ( Tihpalh thilthuah a neitute mawhphurhna a ni tih  hriat tur)
6. Motor in a thlen theih loh chin a awm thin a, kan awmna atanga point hnai berah lo in chhawpchhuah lawk a, lo chan thin tur a ni..
7. Vengchhung Culvert leh Kawrah te Bawlhhlawh paih ngawt hi dan kalh a nih mai bakah, Pawisa chawi theihna a nih avangin mitin te’n Bawlhhlawh paihna motor hi hman tangkai theuh tum tur a ni.
8. Kan veng bikah hian Nilaini leh Inrinni zingkar ah te Motor a tlan thin a, heng  ni ah te hian chhungtin te lo inring a,  lo inchhawp chhuak lawk zel tura ngen  kan  ni bawk.   
    Heng lo pawh hi kan zawm tur tam tak awm kan tarlang vek seng lo. Kan khawtlang thianghlimna kawngah hian mi thenkhat te’n harsatna siam kan ching thin a a pawi hle a ni. Sorkarin ti tur min tih te tha taka zawm mai hi khua leh tui tha nihna a nih mai bakah kan zahawmna a ni tih veng mipuite kan in hriattir nawn leh a ni e. Bawlhhlawh Pack pawh hi kan zawm har zawk mah mah a tunah chuan Sorkar dan siam ang hian Bawlhhlawh te pawh hi Pack a nih loh chuan paih phal a ni tawh dawn lo a ni.

Sd/-PC Lalthanzauva
Secretary
Local Council, Armed Veng South

10th July 2011

Thangkhawk
+Hmanlai hian chhura hi a awma,Tuaisiala chuan'ka u ka ril a tam'a ti a,Isua'n'mihring hi chhang chauhvin an nung lo' a ti a,Nahaia chuan chirawt lungin a ngalah a vawm a,Lianchhiari lung chu a leng ta em em a,Ramar thin a rim a,Sihal ten kua an nei a ti a,a kalna turah chuan puante an phah a,Sanghal a mu vel.Tk kal tlangin kan fiamthu ve lawk a ni e,ka lawm e....# Gereth Bale[5'10]..

+Tun lai hian kan vengah bike bo a va tam ve le,a ti tu hi hriat chhuah vat chi ani.pawi hei ai a lian a khawih hma hian.kan kumpuan duty te khan heng te pawh hi chan ve chi tho a ni lo maw? nunphung hrelo ho hi chu i dim lo teh ang u....# Berbur-a

+ Kumpuan Committee te in fakawm thin e. Tang sauh sauh rawh u. Nangmahni avangin kan veng pawh a nuam sawt viau a nia. Pathianin awmpui che u rawh se.# sms

+ Ni. 4.7.11 (Monday) zana kan inkhawm laiin kan veng information mike-ah vengchhung hriat tur pawimawh tak mai an rawn puang a. Inkhawm tantu in tanna hun a hman lai vel nen a inrual si. Khawi zawk nge ngaihthlak tur tih hriatthiam a har tep a ni. Kohhran hrang hrang kan awm a, ka Inkhawm tan leh ban hun pawh a inrual tlang viauin ka hria. Inkhawm hunlai hi chu nghak hram hram ila, ban hunah puang mai ila a tha zawk awm e. # Darkface

+ Hall kawt hungna ( fencing) saw a chang in tala in an kalh a, tunah chuan a in hung leh tawh lo. Hall luhna dalin Taxi a din leh thup tawh hi. a awmzia hriatthiam a va har ve.# sms

+ Tunlai chu Hmeichhia Scooty in tih theihpui tak tak kan vengah pawh hian an awm tawh nia. In tih theih nana hman chi a ni lo.Lirthei chikhat ah ngaih mai tur. A tlangpuiin in tih theih nan leh in lak nan an hmang tlangpui. i sim teh ang u. Changkang lo zia a ni e.# Man of Lee

+ H Vanlalhlimpuii (Hlim hlimi) IMEM Solo Competition a Top-3 i tling hi kan lawmpui khawp mai che. Pakhatna i nih ngei theih nan duhsakna sang ber kan hlan a che. Kan veng i ti hmingtha khawp mai.I kal leh zelna turah Pathian in awmpui che rawh se.# sms

Kumpuan Sub Committee hmalakna

 
1.Ni 1.7.2011 khan Pu Zohmingthanga Home Chawnpui-ah Damdawi hmansual avangin heng mite hi dah an ni.
Vanlalawia s/o Vanlallawma Section-III
Lalremmawia s/o Lalzawmliana Section-III
Lalawmpuia s/o Hnehthangdula Section-II
2. Ni 3.7.2011 khan Section-III chhunga Ganja kung 39 samtluk a ni a, hemi zan dar 7:00 khan Hall kawtah halral nghal a ni. Phal taka Ganja samtluk phalsaktu te chungah lawmthu kan sawi mawlh mawlh a ni.
Lalawmpuia s/o Kapkunga (L) Section-III chu Damdawi a hmangsual lai man a ni a, Field thlang welfare kutah hlan niin, Pu Zohmingthanga Home ah dah luh a ni bawk.
Lalchhanchhuaha s/o Zokima Section-II zu fun-1 mansak a ni a, warning na tak pek a nih hnuin chhuah a ni.
Hemi ni vek hian MAP field thlang zawkah heng mite hi man a ni a, zilhhauna natak pek an ni.
Lalhmunsiama s/o Roliana Bethlehem Vengthlang
Lalruatmawia s/oLalluaia Bethlehem Vengthlang
Lalnunsiama s/oLalruatfela Bethlehem Vengthlang
3. Ni 1.7.2011 khan Pu Kapkima Mobile phone ruksak a ni a, a rutu Lalremsiama s/o H Lalsawmliana ( L) tuna Zemabawk a awm mek hnenah, pe let leh tura hrilh hriat niin, Zemabawk Branch YMA kutah dah a ni.
4. Ni 7.7.2011 zan khan Lalfakzuala c/o Lalngeni Section-I, chu chhungkua tibuai fo mi a nih avangin, Pi Lalngeni chu titi puiin hmalak dan tur sawipui a ni


Sd/- T Darvunga
Secretary
Kumpuan Sub-Committee 

Pathlawi lungleng min ti maw?

            Shakespeare a thukhawchang sawi tur nei ve lo, Scooter tawng an sawi ang mai a kal su bawi bawi, chal lawk bir ber hian thiante thisen sang ka lo hmusit ve ringawt a. Khup a thir vuah ngat chung hian mi tlawk tlaw te tihdan zulzuiin vawkpa nunchan ka lo zir a, Bible chang hmang meuh a ka bumthluk ka nupui raipuar teuh chuan ka suahsual tukhum pawnah min khawn sak ta a lawm maw le? Ni e, Pathian tilawm nun pawh nei lo, mihring tilawm nun pawh nei chuang lo hian, tih danglamna nun changin nupui te kaplum ka hransan a lo tul ta reng mai. Duhthlang thei dinhmunah pawh ka ding lo. Duh lo teh mah ila, kumtluanga nang then meuh chu.. tiin nupuite kan tahawh a ngai leh ta si.
           Ngaiteh, thianpa Hlima, nupui neih hnu a Gear nghet vuan ta te, TPa te, Hriatchian loh avanga zaithiam ka lo tih em em thianpa Mala (YMA zarah Radio artist chu ani ve awm a sin) te din hmun ka thlir kual vel mai mai a. La nei ve rihlo, Thianpa Hminga leh nei mai tur Rinngheta te ka ngaihtuah bawk a. Awhna sual a ka tluk avang pawh ni hauh lovin awt thei dinhmuna ka din tak avang chauhin an din hmun thatzia chu mitthlaah a lang zut zut mai a. Mahse ka inhnemna awm chhun chu Pathlawi nawmzia engmah an hre lo tih hi a ni. Amaherawhchu tisual leh thin, he ka thinlung bawlhlawh hian ka suangtuah zui ta tho a.
         Rinai ngawt chuan tawrh alo har phian mai. Mahse, ka cho a, ka rim a ka rim thlu taah ka ngai a. Ka lungngaihna a tlukhlum erawh ka tum chuang hauh lo. Ka tih thin , thil tamtak ka thiante’n an la ti chhunzawm bik tur hi chu ka ngai ngam lova, ka thik a, thusawm pek meuh bawhchhia in ka vengte ta awhna ka lo nei ta.
Zingkarah mawlh mai hian ka awt thin. Mutchhuah vanglai takin nuberin min han tlawh chawrh a. ‘Thingpui va lum teh, tukin chu ka tho nuam lo ‘ a tih chhunzawm zat hnua mit ek nen gas kan talh khu luai mai lo pa rem rem zia kha aw...Mahse tunah chuan Nupuite tho pei mang loh changa thingpui lum hruih hruihte ngai tawh bawk si lo. Ka duhleh zing dar 10 ah thingpui ka in a, eirawng bawl buai ngai si lo. Nizan lam a ka chaw chhum hawlh phel phawk lehlam a la bang tih hre ran chunga Artui kan a ni leh mai a. Mahni eirawngbawlsa nupuite nen tum bur a ei lai kha a ngaihawm thin ngawt mai. Chutah ‘ i artui kan per pur chu, Dal engatinge i siam loh?’ Heng zawng zawng hre phak lova awm hi nuam turah ka ngai a, a lo ni hauh lo. Mutna khum leh mut puan pawh zanlama silh leh mai tur anih avangin thlehthat buai a ngai tawh lo a. “ Mutna tal hi chu thlep tha ve rawh” ti a min kek thotu tur kha ka va ngai thin tak em!!! Ka duh leh khum mawngah ka vawm khawm a, sazu bu chu nep te a ni ringawt. Heng zawng zawng la chhunzawm theia an awm hi ka thiante hian lawmna chang an hria ang em aw???
           Chaw thleng seng mawlh mai hi. Nupui neih lo nawm zia kha aw. Chawhtawlh chhungah surf leh nawhfe kan han nuai phuan suah mai a, phur em em maiin kan han nuai ve sa sawi a, Chutah Inspector Sap in a inspect ta a, ‘ Vawi hnih i tleuh nange? ala mawm zul alawm’ dawhkan bula hi chaw mal a va la tam ve, i chete hi a muang lutuka’ an han tihzawm zat hnu a, lehlam hawia kan la nuisen sen theite kha a lo Kristian em em a, Pathian thu nen pawh a lo inhmu zaih alo ni.
             Chutah Bed room sir kil khat a kan bal bawm, Pizawnte hluihlawn tawh ngei mai chhunga thawmhnaw bal tlingkhawmte laka Faina Chanchintha puang turin chhangphut sahbawn tlang tha leng lawng nen veng mawng tuikhurah kan han in pu liam a, kan liam hma deuhin langtheilo kawi atangin nuberin Sahbawn hman dan mawlh mai kha a rawn tih lawm lawm hnu chuan Chhangphut sahbawn hmang mum thei berte zinga chhiar ka lo ni ta. Kan nu thluak thatzia hi ka fak bang thei thin lo. Sahbawn hman mum kha economy em em mai a lo ni.
              ‘Rorelna chu a kokiah a chuang anga’ ... Bible hrilhlawkna zawng zawng ti famkimtu a ka tang thei vannei intih na chang ka lo hrelo kha chu mawl ka inti khawp mai. Puzawnte pawh Nu leh pa tlatna khawvelah ka cheng tih theihnghilh thak khawpin nupuite rorelna hnuaiah ka lo khauphar thawven ve a. Ana lam min chhawn ang tih hlau fahranin tukchuakin kan phe dawr dawr chu alo nih kha. Kan hnathawk haw, bal fahran mai hre lo ang mai a, an tih tur an lo tih luih ngat ngat hnu pawh a, lawm taka la nuih var var theihna kha Isua min pek ani tih ka pawm tlat a. Ka thianpa Nghaka erawh chuan ‘ I hlep’ a ti thung. Kh’ang hlep zawng zawng chhiar thiam tur chuan Krista tawrhna tawrhpui theih kherloh pawhin Buddhist sakhaw zawm a ngai ve ta hial ang. Hengah tak hian thianpa Mala ka hre chhuak thin.Rosgulla ngat a Missionary chawm khan a lo tlin ngeuh ngeuh e ka ti thin.
(chhunzawmah ka ti a)

Christy Pa hnena thaikawi Palai. by Hminga hlawndo

       Hruaitu ropui hming lam a nih chang a, tlar hma chang thin, India ram Prime Minister hmasa ber Jawaharlal Nehru (1889 -1964) khan Lehkhathawn chhiar hlawh, chhuan lo la awm zel turte chen a, an la chhiar zui zel  tur “A letter to Indira on her birthday”  tih Lehkhathawn, awmze nei kumhlun kha a fanu Indira Gandhi hnenah pianchamphaphak  lawmpui nan Naini Lungin atangin a thawn a nih kha.
    “Ngai teh kei mi pawimawh tham lo te hian...” (I am unworthy..Job 40:4) ti tu Job-a inngaihtlawmna awrawl zawmin kei mi pawimawh tham lo te hian he khawvel ramzauva “Ka thianpa” ti a ka chhal ngam mi tlemte-te zing a mi, Sherlock Holmes-a khabe ang pu mi ni i la chuan, “My dear Watson” ka tih awlloh tur TPA of Central AVS hnenah hian thu kam hnih khat lek rawlrukin, a damlo kan nan Thaikawi Palai ka han hlan ve teh ang!
        “...Naini Lungin atang hian eng thilpek nge maw ka pek teh lul ang che le;Tisa mita  hmuhtheih thilpek ropui pek tur che ka nei love; ka thinlung ngaihtuahna i hnena rawn leihbuak mai loh chu...” (“...What present can I give you from Nani Prison. My Presents cannot be  very material or solid. They can only  be of air and of the mind and spirit...”) ti a mi huai kal ta Nehru-a’n a fanu hnena a lo sawi ang mai khan Pu TP, I damlo kan nan tangka leh thilhlu rawn hum luh a rawn zakzeh luh tur ka neih loh zia kha hai der talh a har ngawt ka ring. Natna khumah, Thisen sang avanga i thihawrh mut zuar lai a Samtawk pumchhum teh tlawng ka rawn hum lut erawh kha zawng ka pachhiat lai leh i bawrhsawm lai a innangah min ngaihsak hram ta che! Khawvel tehfung atanga teh a, damlo kan na awm tak thilpek pek tur che nei lo mah ila, ka thinlung ngaihtuahna luangliam lo dawng khawl turin, i beng lo chhi la, i mit leh hnar lo len ta che.  
    I hriselnain ngai a lo awh leh theih nan a, ka thu bengzeh tur che hi ‘Medical Science lama hriatna nei reng reng lo thurawn ka chhiar peih lo” tiin lo hnawl lo hram la ka va ti teh lul em! Ni e, Physiology lehkhabu ai a, “The great works of William Shakespeare” lehkhabu awmkhauh, ka laina te’n Kolkata atanga min rawn hawn  ka ngainat zawk thu leh Hlima Sailovin a nupui duhtak a kuah ngun tluk zet a ka kuah ngun zawk thu hretu i nih kha! Chu ti chung chung chuan thurawn han pek hram che ka la duh ta fan a nih hi!
    “Ka ei zo vek dawn” kan lo tih thinna khawvel hnu chhawn a, “Insumtheihna hi thlarau rah a ni” ti a puar mang hlei lova dul zut zut a ngaihna khawvel thara han chuan kai hi zawng.... zep nak emaw nuihpui tur vang riauva hriat chang ka nei ta fo mai! Ni e, he khawvel tharah hian nang ngei pawh Pem lehkha hum chungin i rawn pem miau mai si a le(h)!“Khua leh tui tha” nih tum mai hi tul salovin a tul ta a nih hi!  “Ka ei thinte ka ei a rem tawh lo, ka ei ngai loh ka ei a tul zawk ...”  tiin Phuihnam tui hang tlak piap piap hnuah Solfa bar pui nek puar pawp pawp khawpin kan han bass thang hiam hiam phawt dawn em ni ang?
    “He damdawi hi i hriat zawng a ni em? Ka hmuzo hauh lo!’  i tih tum a, kan bih dun vung vung i damdawi lehkha mawng lam a, damdawi hming emaw i lo tih hman thelh  “Diet”  tih lo inziak kulh kha a tawitek tawk na a, a fan rilin dawn a ti sei ka ti lo thei lo! “Damdawi  dawr nghaktu te’n, ‘Kan thenawm dawrah sawn an neiin ka hria’ tiin nuithu chungin dawr leh lam min kawhhmuh  zel”  i tih lai khan tukhum sai ngar ngarin ka lo nui a nih kha! Kha hawrawp mal khan a lawm Presbyterian ni a lungawi mai thin i thianpa hi, Vegetarian leh Pedestrian  min nih tir tu chu!
     Bawrhsawmna tukdawl a, ngai i lo awh ve leh theih nan Presbyterian i nih ve kher erawh a tul hauh lovang le! Nang zawng Babtist thalaite hmachhuan leh hmatheh ber i nih kha. “Presbyterian nilovin vegetarian leh Pedestrian ka ni e”  ti a i inchhal zeuh zeuh erawh a tul chang a awmngei ang!
    Pulsar 150 DTSI hung tha a, vartianah i hriselna i ngaihpawimawh avanga mutbu thawhsanin, i taksa i sawizawi thin tih thawm ka lo hria a, “Tlukloh rim nam Pedestrian TPA”  tiin hminglem ka lo chher sak hman hial che a nih kha. “Mahse” kan ti leh hram teh ang. B.P sang tan hian eng ti ang a thui nge tuk khatah hian kal tur tih hre lo mah i la, In kawt kai atanga Presbyterian Biakin kawmchhak thleng chauh  han kal chu(h)! I thleng tawi em mai a, “Exercise” tih hian a huam phak ka ring lo thelh thelh thin! Exercise nilovin Exer i la ah kan ngai mai a ni ang chu.. Nike, Adidas leh Reebok Showroom-a thawmhnawte ai a Second hand bale an hawn chang a, kekawrbul lian pui pui leh T-Shirt arh hlei hluai, i hakawm leh i mawi pui tur ka hmuh hnem zawk thu erawh midang hriat lohin, inthlahrung takin ka han hrilh hram teh ang che. Exer piahlam, Exercise tak tak i lak a tul ta ni in a lang. I khawilo kal tur fahran, “Dr Remmawia i pan dawn e lo?” ti a Raipuarte Daktawr hming meuh lam a kamchhe tleuh nan a lo hmang thin tute awrawl ka hriat fuh chang phei chuan ka lo lainat ru ngawih ngawih thin che a sin!. Fimkhur rawh! Kan pi leh pute pawh khan Thla hlei pai hi thil hlauhawmah an ngai a nia. 

    Ei leh in chungchangah hian han khak leh hlek ka la duh che a, dawhthei takin min lo dawngsawng leh hram ta che. Christopher Marlowe nge kan thianpa Mala zawk, “Puzawnte’n vawk an talh chang a Pizawnte tawngkam tha um a, kar tluan a an choka han tawm chuan,kan rit tulh tulh a, kan ril lo tulh tulh a, kan I.Q aiin kan B.P a sang mai zel” ti tu kha?A sawi fuh ang reng. He thukhawchang avang chauh tal pawh hianTawngkam tha hi um phak lo zeuh zeuh a tul ta a ni ti hriain Section II Leader vawktalh chu thauvin tuihnai eng ang mahse ngawi reng a khual chhe pelh i zir te pawh a tul ta ve ang! “Chhungkaw pa ber ka ni e” tih vang a Thirbel mawm zawng zawng tal fai vek tum thin pawh hi i  pemna khawvel thar hi chuan rem a tih pui lo che a ni tih hi lo theihnghilh lul suh ang che. Thirbel mawm kha zawng, “Ka thian Christy tan” ti lovin “Ka fanu Christy tan”  ti zawk nang che..!

(Note:He Lehkhathawn hi Aizawl Dak Inpui atangin Speed Post hmang a rawn thawn tum che ka ni a, Dak In aia ZNP Editor chenna In pan mai a awlsam avangin Postal Deptt lam chu ka han tibuai ta lo mai a ni.)

17th july 2011

Young Mizo Association , Armed Veng South Branch
EXECUTIVE COMMITTEE VAWI-7(408) THUREL TLANGPUI 

*Branch Comtt.-ah Committee thawhlawm a awm tawh dawn*

Avs 17/7/2011:-   Ni 16. July.2011 zan khan Committee Room ah Branch YMA Executive Committee neih a ni a, chuta thurel tlangpui lo tarlang ila.

Reports: 1.Fin Secretary hnen atangin chhiatni fund luh dan report ngaih thlak a ni a, kumin a chhiatni fund lut zawng zawng chu ` 89350 a ni.

2.Kumpuan Sub-Committee Secretary hnen atangin reports ngaihthlak a ni a, Kumin ni 11.2.2011 atanga hmalak tan a nih thu leh an ruihhlo man tawh te bak ah an hmalakna hrang hrang ngaih thlak a ni a, an hmalakna avang hian kan veng pawh a ralmuan sawt thu te ngaih thlak niin Committee chuan lawmawm a ti hle

3.Kan vengah pem lehkha nei mumal lo an awm nual avangin, Branch YMA chuan pem Lehkha nei lo te dap chhuakin  In luahtirtu leh an In luah te chungah a tul angin Action a la dawn

1 .SIPMIU Sewararage Awareness Campaign Chungchang : AMC Ward No-VIII a\anga lehkha hmuh SIPMIU Sewararage ( Ek In thli leh Tui chhe paih zawng zawng hmun khata luankhawm tir) Ni 29.7.2011 a Awareness Campaign kan veng a an rawn neih turah YMA te phungbawm tura an rawn sawm angin, a \ul anga lo buaipui nise tih a ni a, hetiangin chanvo pawh siam rem nghal a ni : Refreshment i/c Pu R Lalthanzuala, Section-III member te. Ushering : Section-III. Light and Sound : Branch YMA i/c te ruat an ni.  ( He hunah hian Vengchhung mipui a tam thei ang ber kal turin an duh hle a ni.)

2 .Deputy Conservator of Forest (Wildlife Division) hnen a\anga Lehkha hmuh : Nungcha humhalh chungchanga \an la tura an rawn ngenna chu tih hlawhtlin nise, Branch Ob ten a \ul angin hma lo la se tih a ni.

3. MHIP Armed Veng South Branch a\anga Lehkha hmuh : MHIP Armed Veng South Branch a\angin 24.7.2011-a an Branch Silver Jubilee (Kum-25 na) lawmpui tura Branch YMA OB an rawn sawm angin, tih hlawhtlin ngei nise tih a ni.

4. YMA day thlir let : Kumin YMA day hman dan thlir letna neih a ni a,  a tlangpuiin Programme kalphung chu \ha hle in a hria a, a zawngchhang tlak hle bakah, member te in pek na ah Branch Committee chuan lawmthu a sawi mawlh mawlh a ni.

5. Bialtu Minister-a PA set dil: Kan Branch in kan mamawh em em, PA set chu Bialtu MLA Pu Lalsawta’n min pek a hreh loh thu ngaih thlak a nih hnuin, remchang hmasa berah dil nise tih a ni.

6. Sum tuak dan tur : Hetiang hian sum tuak dan ngaihtuah nise tih a ni :
1) Committee thawhlawm neih : Committee thawhlawm hi neih ve tawh nise, Committee neih leh hmasak ber a\angin  neih tan nise tih a ni.
2) Bazar Area a parking fee khawn : Kan veng Bazar Area ah Parking fee khawn dilna Hall Committee-ah thlen nise, Amaherawhchu, thil kalphung lo zirchian hmasak nise, chumi hnuah ngaihtuah \hat leh nise tih a ni.

Chhungkua
 
Branch : IMEM Gospel solo Competition zawh takah kan veng tleirawl H Vanlalhlimpuii Section-III chu pahnihna a ni. Ni 14.July.2011 zan khan YMA bultumin Community hall-ah Big Screen-in Result puang lai chu a hu hova en a ni a, a hmunah pawh Branch YMA OB thenkhat , Member thahnem tak leh Local Council lam hruaitu ten an han tawiawm bawk. A lo haw hi Community hall-ah ropui taka lo hmuah a ni a, Branch YMA chuan hetianga kan veng ti hmingthatu hi  a chhuang tak zet a ni.
  
Section-I: Remchang hmasa ber ah Committee neih an tum.
  
Section-II: Sumtuakna atana Tui leh electric Bill khawntu te chungah leh inhlawhna lo siamsaktu chhungtin te hnenah Section II Committee chuan lawmthu an sawi takzet a, remchang  lo siam zel tur pawhin an in ngen a ni. Tin An Section Committee member  Tv Chhuana leh Thianga te’n  eizawnna avangin Chenai lamah an liam san, an lawmpui rualin an ui hle a ni.
  
Section-III: Sumtuakna atana Bill khawntute chungah leh inhlawhna lo siamsaktu chhungtin te hnenah Section III Committee chuan lawmthu a sawi takzet a, remchang lo siam zel tur pawhin an in ngen a ni e.
uYMA chhang: Ni 17.7.2011 (sun..) tlai  dar 3;00 hian Armed Veng South Branch YMA chhang, Section tin OB leh i/c te Hall-ah Committee neih tur a ni a, kim taka kal tur a ni a, member ten i ngai pawimawh ang u.
 
ARTICLE

Hall/Auditorium Sak tura ka suangtuahna

-Kim2 i pa..

      Hetia hall sa tura ruahmanna thar kan neih takah chuan hetiang hian suangtuahna ka lo siam a, huaisen takin a duh apiang tana zirchian turin ka chhawpchhuak e.
Ruahman Chhin: Muma School kawt ko pangah hian a ban thlang lam ding se, tuna kan building neihsa dung zawng anga sa tho si in motor kawng chungah hian building lian tak sak ni se. Hetianga kan sak chuan motor chungah hall/auditorium kan nei ang a, tuna hall atana kan hman mek hi Auditorium varanda atan a hmangin Reception dawhkan leh thingpui in na leh chawlh lailawkna hmun atan hman tur a ni ang. Tuna YMA Committee room leh zun in te hi Inthiarna hmun atan kan siam chho vek ang.
    Hetiang taka lian building sa tur chuan sum a ngai tam hle dawn a, Armed Veng South tana Pilot Project a tling dawn a ni.
Eng vanga hetiang ang project lian hi rawt nge ka nih....a chhan tam tak a awm thei ang, mahse a pawimawh ni a ka hriatte chauh lo sawi ila:
1. Armed Veng South-ah hian Mizoram chu sawiloh Aizawl mipuite’n min hriat mai theihna tur Infrastructue lian a awmlo. Hriat tham leh sawi tham tur thil engemaw tal neih ve hi he veng mipuite hian kan phu a, kan mamawh. Chutiang tur chuan sawihat tham Auditorium i sa ang u, ka ti a ni.
2. Aizawl East-II huam chhungah hian Official function neihna tlak leh remchang tha Hall/Auditorium a awm miahlo. A awmchhun Chhinga Veng, Saron Veng leh Armed Veng Hall te hi Hall satliah mai an ni a, motor parking-ah a remchanglo em em vek leh nghal. Sorkar function lian tham leh pawimawh thleng zo tur Building tha hi nei ngat ila chuan, kan hawiher leh sukthlek a sang sawt ang a, mi satliah nilo kan vengin a mikhual fo chuan vengin a than phah em em ang tih hi a rinawm a ni.
3. Hall satliah ngawt hi chu a tam lutuk. Veng dangte entawn tur leh thik tham tur engemaw tal hi Armed Veng South-ah hian i nei ang u. Chutiang tur chuan rilru leh ngaihtuahna hmang turin i in buatsaih ang u.
    Han suangtuah chhin teh u, Muma School chhak kawngpui chungah Aizawl Auditorium bawk vung mai se, a hnuai kawngpui hlim-ah Auditorium sak thar hawngtu tur Chief Minister Motor tlenglut zal zal tur han suangtuah chu nuam tak a ni. Chu hun a thlen hunah chuan tuna hall sak kan tumna-ah hian YMA Office leh YMA Library felfai leh changkang zetin kan sa chhunzawm leh ang a, chutih hunah chuan tuna Zonunpar Editor hian fa 4 a lo nei hman tawh ang a, Manager pawh a excer lak that avangin a T-Shirt neih thar apiang a hma a puar tawh bik lovang. Hun nghahhlelhawm, thleng thei ni si, thleng lo thei ni bawk a ni.

THANGKHAWK

+ An khua kha an la changkang lutuk lo va,an khua a two wheeler nei ai chuan tlangval thingro awm na hria an luck zawk. Aizawl thlen nan ticket-3 cut a ngai vel he he he...,Kan fiamthu leh lawk a nih kha,ka lawm e...Hlimi top-3 a i tling kan lawmpui ce in kan chhuang lutuk che,kan veng i ti hming tha i iti nuam e,i kalzel na tur ah Pathian in awmpui che in veng zel che rawh se. # Gareth Bale[5’10].T.A.]

+ Pu, TK kan veng Y.M.A in name plate siamna tur atana Rs.10  an rawn khawnna kha arei tawh teh reng nen, an la siam lo nge an siam tawha an la zo lo? # L.R.

+ H. Vanlalhlimpuii, thinlung takin ka lawmpui a che. Felhlel deuh te a lo awm a nih pawhin he lei anchhedawng intehna ram hi i ram a nilo tih hria in huaisen takin, i hma a chona leh tih tur awm chu ti zel ang che. # C-19

+ H Vanlalhlimpuii pakhatna nilo mah la, kan chhuangin kan lawmpui lutuk che. # sms

+ Driver/Rider tuihawk leh tuichhia mi chilper ching an la awm tlat. A va han thing ngawih ngawih em. Kawnga ke a kal te ngai pawimawh lo lirthei khalh tu te hi chu, hnung lam atanga vawm vak mai tur. sala... # sms

IMEM Gospel Solo Competition 2011 neih zawh takah  Pahnihna kan veng Tleirawl H.Vanlalhlimpuii, Zonunpar Chanchinbu in a kawmna chu hei le :-

I nu leh pa hming : H. Lalthangmawia leh Zorampari.
I pianni leh kum : 13th  Oct. 1995.( Libra)
In unau zat : Pathum kan ni a, a upa ber ka ni.
Pawl engzat nge i zir : Pawlkua ka zir mek.
Engtik atanga nge i zai tan : Kum nga mi ka nih  atangin ka zai tan.
Engnge nuam i tih ber : Zai bakah ei leh in.
I zai tawhna a nuam i tih ber : Eco-Club Conference Hyderebad.
Engnge i hlimni ber : Ka pianthar ni.
Tute nge i ngaihsan ber : Ka nu leh Pa.
I huat zawng ber engnge : Mi rilru nghet lo leh rinawm lo.
Infiamna lam ah engnge i ngainat : Fooball.
Infiammi i duhber : Robin Van Persie
zaithiam i ngaihsan ber : RTC. Lalduhawmi leh Vanlalsailova.
I Bible chang duhber : Sam 37: 5-6.
I hla duh ber : Pathian hmel (Mizo) That when the Angel rejoice (English)
I ram hmuh chak ber : Hollywood (Callifonia)
Mizo zinga i ngaihsan ber : HT. Sangliana.
Fakna hla i sak chhan : Talent min petu Pathian hi fak let tur ka ni tlat a lawm.
Love song i ngaihdan : A satu thu thu a ni a, Piangthar tan erawh sak kher a tul ka ti lo.
Engnge zaimi ten an tlakchham i tih : Zuk leh hmuam, ruih theih thil leh Guthkha siamlakah kan in sum thei lo hi kan tlakchham niin ka hria.
Armed Veng South i hmuh dan : Veng in lungrual leh nuam ka tih ber a ni a, hmasawnna tur erawh kan ngah in ka hria.
Engnge sawi duh dang te i neih : Lawmthu sawina tur ka ngah hle mai, kan khawtlang mipui, min duhsaktu te, thilpek min petu te, min tawngtai saktu te, thawmhnaw min petu te, A pi leh Pu te chungah te, U Valtea te nupa chungah te leh YP. Corps chungah te, Branch YMA, Section YMA, Local Council, MHIP te leh mimal min duhsaktu te chungah lawmthu ka sawi takzet a ni.
    I kal zelna turah kan veng ti hmingthatu i nih avangin Zonunpar chanchinbu ten duhsakna sang ber kan hlan mawlh mawlh che a,  kan chhuang takzet che a ni.

26th June 2011

THANGKHAWK

+ Kawng chunga Biak In Sa lai mek te hian kawra an leivung paih te hi kan Local Council te paw’n paih tawh lo tura an hriattir tawh hnu ah pawh an paih zui zel mai. Kohhran meuh chuan tihluih awm loh tak a nia, engtia hmalak chi nge ni ang aw? # Leivung ninga


+ Pu TK, tu te pawh hi dan hnuaia awm kan ni. Dan in tan Inah min dah a, dan vekin min chhuah leh thin. Bail theih case (bailable) a nih phei chuan magistrate-ten an tan tir talh mang  lo. Bail tu neilo pawh PR (personal release) in an chhuak leh mai thin. Mithiam zawkte khan han sawi ve teh u. # Thangur = CYMA level atanga Branch YMA level thlengin he thukhirhpui hi chai tawp theih a ni lo. Mihring insiam thatna tur leh khawtlang nun siam thatna tur hian ziak loh dan bu hi  keu a ngai leh mai thin chu a nih hi!


+ YMA Day lawmna zana NGO aiawh ten tawite a lawmpuina thu an sawi kha hmasawnna a va ni chiang em. Sawi duah hun a ni lo reng a. # sms


+ Furpui kan hmachhawn dawn niin a lang. Kan veng kawngpui te a rualrem lo hle a, motor khalhtu te pawh hian mihring chil per loh hram tum ta ila ava tha dawn em. Hetiang hunah hian a ni, mipangai hriatna chu. Kei chu tui hawk min chiper a nih vaih chuan ka che nasa ngawt ang le. # Tuihawk chilper duh lova


+ Kan vengchhung a dawrkai te hriat atan: Customer-te  dawnsawn thiam a va pawimawh em? Puitling, naupang, mihausa, mirethei, tu pawh tha tak leh hawihhawm taka lo chiauau hi changkanna a ni tih hre thar ang u. Lei miah lo a min zawt vak a nih pawhin sumdawngte tawh tur a ni reng a ni tih pawm ngam ila a tha ang em? Ngaihtuah a ngai e. # Darkface


+  Liverpool F/C supporter ni chunga Hlimi zai han ngaihthlak veng veng chu a va nuamin a va thawventhlak teh lul em! C’mon... Hlimi, kal zel teh. # Kop


+  Kan vengah hian Welfare engemawzat an ding ta, an thil tum hi enge ni ang aw ti in ka ngaihtuah thin a thenkhat hi chuan bungrua leh Welfare fund ti a pawisa khawn chauh hi a ni emaw ti in ka ngaihtuah mai mai a...An bungrua te hi pawl a tawp rual hian engtinnge an tih ang le??? # OO7


+  Taxi driver zingah hmuhnuam leh bengvar tak tak an awm ta nual mai. Fur khawchhe hnuaia zirlai huh hnuang a in lam pan hnak hnak te an phur hreh miah lo hmuh hian Mizo nih a va nuam leh zual thin em. # Dady


+  Pu Tk, kan vengah hian thalai mahni thawhawm tawk thawk hreh miah lo leh Phai lam thleng thlenga hna zawng an awm ta teuh mai. A chhe lai sawi vawng ai chuan mi entawntlakte thur chhuaha, tarlan hi tunlaiah chuan a tangkai tawh si a, i hre reng thin ang u. # Dady


+  Inkhawm nuam vek u le. # Puff



ARTICLE---

KAN VENG WESITE I SIAM ANG U..
— George Zoramsanga, Sec. I

    Mite awmbo ang chen chu ka la awmbo lo na in kan veng ngaih a na thin khawp mai. Hei, rin loh deuh main ka awmna khuaah kan veng tlangvalin Hostel- a lo siam reng mai!  A hming ka lo hre ve chiah lo a, ka hming hnaisailo tak hian min ko vei nalh mai; hmelhriat ka hmu e.
    Hmun danga awm chuan Pathianni tuk a Zonunpar hmuh loh hi a khawharthlak riau a. Thiante hnung ka lo zui ve tawhna kan Kohhran chanchinbu ka chhiarloh chuan ka khingbai riau bawk. E khai, ka awmna khua a Presbyterian Kohhran chuan an chanchinbu pualin website an lo nei reng mai. Rualawh a na tan.
    Website siam ang u-  ‘Mi veng paw’n an siam a, siam ve ang u’ tih vang pawh a ni lo. Rawt chhan ka nei a, chu chu hei hi a ni. Hmun dang atang chuan mahni veng chanchin kan ngaihven em em a, hriat kan chak ngawih ngawih a. Chumi atan chuan hmundanga awm kan veng mi zirlai leh hnathawk ten an lo chhawr tangkai dawn a ni. Mahni veng chanchin hriatreng chuan kan inti Armed Veng South reng dawn a, mi tha tak tak kha kan veng zunah kan uai tir reng thei ang. Website kaltlangin kan veng zawlaidi kan tat dawn tihna a nih chu. Kan veng atanga hmun danga awm chhuanawm ve tak takte AVS pa kan nihtir reng theihna kawng pawimawh pakhat a lo ni dawn a ni.
    Engtin? Tu te’n nge siam ang. A website hming a tan armedvengsouth.com emaw armvengsouth.com emaw ni mai se.  ‘Arm’ tih mai ka rawtna chhan chu mi tam tak hian ‘ed’ lai khi an hre tel thin lo a, kan veng website a an luh duh huna an tan a awlsam nan a tha ve riau ang. Tin, YMA emaw, Kohhran pawl hming emaw aia siam ai chuan Local Council hian bul tum se. Chutah chuan inchhung khawm vek ila website tlawh a manhla thei ang. Kohhran hrang hrang chanchinbu kan dah lut anga, thlalak chi hrang hrang nen. U Taia cher lai thlalak te, U Thantea kungfu thiam lai thlalak te. Kenneth-a sek lai thlalak kan duh loh leh Valtea in vawrhvir lai thlalak kan en ang a, U Rohlui nulat lai thlalak te... dah tur atam lutuk. Kan mobile camera atangin tlaivar zan a muthlu che chhe deuh thlalak te. A tha dawn a sin. Hetiang website-hi chu kan veng tlangval Pu Johny-a te, Tv Lpta te hian an siam thiam ka ring tlat.
    A intih changkan thlak kanti maw- A changkang lutuk, kan veng tan a la sang kanti maw? Nu leh pa duhtakte u, ka’n hrilh ang che u. In fate, in tute khan mut hmunah sms chauh ni lo, phone-ah internet hmangin thian an kawm mek a nia. An frenzo loh leh an facebook a, an khum atang khan Dawrpui tlangval an han kuah a, Delhi tlanga lehkhazir an zuk ‘muah’ a, Mumbai a hnathawkte an zuk kherh bet vel tawh maw le! I hriat miah loh khan a then chuan vaipa te an inzut damtir (?) vel, phone hmangin. Chuvang chuan website lo nei ta pawh ni ila mitin ban phak a ni tawh. Veng pawna awmte tan hian AVS chawhlui kan buatsaih sak hi a tul tawh viau lo maw?
    Tlangkawmna- Google-ah Armed Veng South tih kan lut chhin a, ORKUT-ah Armed Veng leh Armed Veng South tan in kawmna an lo siam reng mai. Kan veng pual website chu neih a hun a ni satliah lo, a tul tawh a ni. Thudang kan belh lawk, kan veng atang hian INTERNET pawt duh inthurual a, BSNL broadband te pawh luh tir a hun tawh viau in ka hria. Film-a tawng lehlin lam timi  tan phei chuan a tha dawn a sin. BSNL hotuten “In veng a mawng” ti a min hnial thlak ziah hi customer kan tam chuan an rawn lut duh em em ang.

CHHUNGKUA:

 Section-II: June ni 28 leh ni 29 zan hian Variety Show puala Ticket zawrh hnatlang  zan dar 7:00 ah neih a ni dawn a, Pu R. Hrangdailova In ah innghahkhawm tur a ni. An ticket zawrh te lo leisak turin chhung tin te an ngen a, hei hi mi harsa te tanpuina tur a ni tih rilru a lo hrereng turin an ngen a ni
    Tin, June ni 30, Ningani chhun dar 12:00 hian Community Hall ah hnatlang neih leh tur a ni a,   member-te thahnemngai taka thawkchhuak turin an in ngen a ni.

 Section-III:  : YMA Day a Setion III huamchhung atanga thisen pe mi 12 zet chungah Section Committee chuan lawmthu a sawi tak zet a ni.
uLibrary  : July thla tir lama hawhchhuah theih turin Lehkhabu thar lei tumin hma an la mek a, member te tan lehkhabu ngaihnawm tak tak chhiar tur chhawp chhuah ngei an tum. Member ni duh tan`30 pe in member a bih thei a, Kartin Thawhlehni leh Inrinni tlai Dar 3:30-5:00 ah YMA Committee room ah lehkhabu hi hawh theih a ni.

 Section-I:   YMA chhang  : Ni 30 June 2011hian Section-I YMA chhang te chuan sumtuak hnatlang nei turin Dar 2:00pm hian Leader Fakzela te In ah hnatlang turin Committee member te kal vek tur a ni.

YMA DAY THLIRLETNA

 (Armed Veng South Branch YMA in a hmandan)
    Kumin YMA DAY hlawhtling taka hman zawh a lo ni leh ta. Kum dang ngaihtuah chuan tun kum kha a hlawhtling bik ti ila kan ti sual awm love. Hruaitute leh Member- te inpekna a ropui tak zet a ni.
    Kan chetvelna leh kan chanvo hlawhtling tak tak \henkhat lo thlirlet zawk ila.
     Hnatlang: Khawchhia leh ruahsur karah khati zat member hnatlang kan awm thei kha a ropui tak zet a, tunhnaiah khawtlangin hriat lawk loh chhiatna kan tawk zauh zauh a, member-te pawh kan rim malh malh hle. Chutiang kara inpekna thuk tak nena thawk chhuak member te an fakawm hle a ni.
     Thisen pek: Hnatlanna kut kan silfai hman \awk tihah Day pual a thisen pek tur thu in min han nawr chhuak leh nghal a, hah pawh sawi hman lek lova mi te nunna chhan nan tiin kan han pen chhuak leh nghal a, mahni insengso chunga YMA rawngbawlna a tuichilh tlat member khati zat kan han awm thei te kha a va han thlamuan thlak teh lul em. Chu mai a la nilo; Gan Sabra leh Tawngtai Bethel Camping Center lama khati zat \anpuina sum leh ei tur kan han pe thei te kha Samari mi \ha nunchan kan phochhuak nasa hle a ni .YMA vul zel rawh se.
     Zan lam: Programme Committee leh Sports Sub Committee -te thluak tih fin in a awm. An Programme play leh formation a fuh cher cher hle mai; khatiang programme kha tunlai \halaite leh rawlthar zawk te nuam tih zawng, puitlingte tan a thlir ninawm si loh min hlui kha a fuh thlawt a ni. Armed veng South-a pa inchei inhmeh ber leh nula zaithiam tawp thang ten a mipui min han thunun thiam dan te kha a va tawk chiah chiah em! Section tin te’n an chanvo hneh sawh tak mai a an han ti velte kha tunhnaiah hmuh tur a  va vang ta em! Kan rawlthar zaithiam tak tak pathum te khan engnge maw inhmuh bik a, khati tak mai a member te min tih phur a, pa in pa ka ni tih pawh inhre zo lo khawp a min siam tak mai le. In va hlu em! He khawtlang hian nghilhni reng kan nei tawh lovang che u.
    Kan President leh Vice President te ha hmai lang leh hahni dai duk khawp a nuih tir tu Pu Lawmtea tak kha sawinin theih a ni tawh dawn lo. Kan hlim tlang in kan khamlo tlang a ni ti in tlip mai teh ang.
    Sound system atanga a chhepchher thleng in buai a awm lova, a Control-tu te inpekna a fakawm hle.  Programme hnawk leh buaichuar  a awm lova \ul lova hun khawhral lah a awm hek lo. YMA DAY chhinchhiah tlak tak a ni e.